अपिल मिडिया प्रा. लि.
सूचना विभागमा दर्ता नं. : २४८२/२०७७–०७८
Office: Kathmandu Metropolitan City- 29
Phone: +977 9851107824
Admin: [email protected]
News: [email protected]

मुख्य समाचार

मन्त्री नेम्वाङको पहलमा स्तरोन्नति हुँदै पाँचथर जिल्ला अस्पताल


पाँचथर- भौतिक पूर्वाधार तथा यातायातमन्त्री वसन्तकुमार नेम्वाङले पाँचथर जिल्ला अस्पताललाई १ सय शय्याको अस्पतालमा स्तरोन्नति गर्न प्रदेश-१ का मुख्यमन्त्री शेरधन राईलाई आग्रह गर्नुभएको छ ।

मङ्गलबार मुख्यमन्त्री राईलाई पत्र पठाउँदै पाँचथरबाट निर्वाचित निवर्तमान प्रतिनिधिसभा सदस्य मन्त्री नेम्वाङले पाँचथरसहित तेह्रथुम, ताप्लेजुङ र इलामका सर्वसाधारणले सेवा लिने सो अस्पतालको स्तरोन्नति अत्यावश्यक भएकाले स्तरोन्नति गरी बजेटको व्यवस्था गरिदिन आग्रह गर्नुभएको हो ।

मन्त्री नेम्वाङले भौतिक पूर्वाधारसमेत तयार भएकाले पाँचथर अस्पताललाई आगामी आर्थिक वर्ष २०७८÷०८९ को नीति, कार्यक्रम तथा बजेटमार्फत व्यवस्था गर्न मुख्यमन्त्री राईलाई आग्रह गर्नुभएको छ ।

उक्त पत्र प्राप्त भएपछि मुख्यमन्त्री राईले मन्त्री नेम्वाङको आग्रह र पाँचथर जिल्ला अस्पतालमा सेवाग्राहीको चापका आधारमा उपयुक्त निर्णय लिने वचन दिनुभएको मन्त्री नेम्वाङका स्वकीय सचिव गणेश योङहाङले जानकारी दिनुभयो ।

मन्त्री नेम्वाङकै पहलमा गत वर्ष जिल्ला अस्पतालमा आईसीयू र भेण्टिलेटर जडानका लागि प्रधानमन्त्री कोभिड–१९ आकस्मिक कोषबाट दुई करोड रुपैयाँ बजेट समेट विनियोजना भएको अस्पताल विकास समितिका अध्यक्ष एवं जिल्ला समन्वय समिति पाँचथरका प्रमुख विष्णुप्रसाद सापकोटाले जानकारी दिनुभयो ।